ფოთის მერმა ანგარიში წარადგინა

ქალაქ ფოთის მუნიციპალიტეტის მერმა ანგარიში წარადგინა და განსახორციელებელი და მიმდინარე ინფრასტრუქტურული პროექტების პრეზენტაცია გამართა.
საჯარო შეხვედრას, სახელმწიფო რწმუნებული სამეგრელო-ზემო სვანეთის მხარეში ალექსანდრე მოწერელია, ქალაქ ფოთის მუნიციპალიტეტის მერი გოჩა კურდღელია, საკრებულოს თავმჯდომარე ირაკლი კაულია, მერიისა და საკრებულოს ხელმძღვანელი პირები, საზოგადოების წარმომადგენლები დაესწრნენ.
ინფორმაცია ინფრასტრუქტურული პროექტების თაობაზე ქალაქის მერმა გოჩა კურდღელიამ წარადგინა, მანვე უპასუხა დასმულ შეკითხვებს სამომავლოდ დაგეგმილ ღონისძიებებთან დაკავშირებით.
სახელმწიფო რწმუნებულმა სამეგრელო-ზემო სვანეთის მხარეში ალექსანდრე მოწერელიამ აღნიშნა, რომ ფოთში დაგეგმილი კულტურული მემკვიდრეობის ძეგლების რეაბილიტაცია ბიძინა ივანიშვილის მხარდაჭერით განხორციელდება.
ფოთში მდინარე კაპარჭას გაწმენდითი სამუშაოების მასშტაბური პროექტი აქტიურად მიმდინარეობს. პროექტი მდინარე კაპარჭას 3 700 მეტრიანი ზოლის გაწმენდასა და პალიასტომის ტბის ჰიდროდინამიური რეჟიმის აღდგენას ითვალისწინებს.

დაიწყო კუნძულის უბნის სანაპირო ზოლის კეთილმოწყობა. მიმდინარეობს კოსტავას ქუჩის ცენტრალური ნაწილის ტროტუარების რეაბილიტაცია. დაწყებულია ქუჩების არსებული გარე განათების ქსელის ლედ-სანათებით ჩანაცვლება. ასევე მიმდინარეობს თეატრის რეაბილიტაცია.

დასრულდა ბარათაშვილის ქუჩისა და მალთაყვის ბულვართან დამაკავშირებელი გზის მშენებლობა.

2019 წელს გაზიფიცირდა 5 საბავშვო ბაღი. 2020 წელს კი ფოთის ყველა საბავშვო ბაღი გაზიფიცირებული იქნება.

ქალაქის ხუთ საჯარო სკოლას ჩაუტარდა სხვადასხვა სარეაბილიტაციო სამუშაოები. პროცესი მომავალ წელსაც გაგრძელდება.

ასევე განხორციელდება ქალაქის ცენტრალური სტადიონის რეაბილიტაციის მეორე ეტაპი. პარალელურად მიმდინარეობს საფეხბურთო სკოლისთვის ორი ბუნებრივსაფარიანი, თანამედროვე სტანდარტების შესაბამისი მოედანების მშენებლობა.

მოხდება ფოთის ჰიდრომელიორაციული ტექნიკუმის ყოფილი შენობის სრული რეაბილიტაცია, სადაც საზღვაო სასწავლებელი განთავსდება.

გაიწმინდება და აღდგება მდინარე რიონის ქალაქში გამავალი არხი, მოეწყობა ნაპირდამცავი ჯებირები. რაც მნიშვნელოვანია რიონის ჰიდრო დინამიური რეჟიმის აღდგენის, შავი ზღვის სანაპირო ზოლის სტაბილიზაციისა და წყალდიდობის პრევენციის მიზნით.

ფოთში მდინარე კაპარჭაზე ახალი სანიჩბოსნო ბაზა აშენდება, ამჟამად საპროექტო სამუშაოები მიმდინარეობს. სანიჩბოსნო ბაზაზე განთავსდება საცურაო აუზი, შენობის გარე და შიდა სივრცეები ადაპტირებული იქნება შშმ პირებისთვის.

მოხდება ფოთის ცენტრალური კულტურისა და დასვენების პარკის რეკონსტრუქცია. მოეწყობა საფეხმავლო ბილიკები, დასასვენებელი ადგილები და სათამაშო მოედნები ბავშვებისთვის.

იგეგმება ყოფილი უშიშროების შენობის რეაბილიტაცია, რომელიც კულტურული მემკვიდრეობის ძეგლს წარმოადგენს.

რეაბილიტაცია ჩაუტარდება ჭავჭავაძის, თავდადებულის, თამარ მეფის, ბერდიანსკის, ბესიკის, აკაკის და წმ. გიორგის ქუჩებს.

მომავალი წლიდან ფოთს 10 ახალი ავტობუსი ეყოლება, მოეწყობა გაჩერების ადგილები.

ქალაქ ფოთის მუნიციპალიტეტის მერმა გოჩა კურდღელიამ ისაუბრა ბიუჯეტის შესრულებაზე, ინფრასტრუქტურულ და სოციალური პროგრამების მიმდინარეობაზე. მისი თქმით ჯანდაცვისა და სოციალური პროგრამებით 2700-მდე მოქალაქემ და ოჯახმა ისარგებლა.

.