ფოთში ოკუპაციის დღე აღინიშნა

ქალაქ ფოთში ოკუპაციის დღე სხვადასხვა ღონისძიებებით აღინიშნა. ნიკო ნიკოლაძის კოშკში 1921 წლის ოკუპაციის ამსახველი ხელთნაკეთი პოსტერების გამოფენა -პრეზენტაცია გაიმართა. ასევე ოკუპაციისადმი მიძღვნილი ვიდეოფილმის ,,იუნკერების“ ჩვენება მოეწყო.
ფოთის თეატრში კი მე-3 საჯარო სკოლის ორგანიზებით სპექტაკლი ,,ახლა ეს ლექსი სხვა რამეა“ ჩვენება გაიმართა. 45 წუთიან სპექტაკლში, ბავშვებმა, ოკუპირებული საქართველოს ისტორია, საოცარი ოსტატობით გააცოცხლეს. სპექტაკლის სცენარისტი და რეჟისორი ლევან მაშავაა.
საბიბლიოთეკო გაერთიანების დარბაზში, ოკუპაციის დღესთან დაკავშირებით დოკუმენტური ფილმის- ,,ხანმოკლე მეოცე საუკუნე“, ჩვენება შედგა. ღონისძიება ქალაქ ფოთის მუნიციპალიტეტის მერიის კულტურის, განათლების, ძეგლთა დაცვის, სპორტის და ახალგაზრდულ საქმეთა სამსახურის ორგანიზებით გაიმართა.
1921 წლის 25 თებერვალს, რუსეთის წითელი არმია საქართველოს ტერიტორიაზე შემოიჭრა და ქვეყნის ოკუპაცია განახორციელა. საქართველოს პარლამენტის 2010 წლის 21 ივლისის დადგენილების თანახმად, 25 თებერვალი საბჭოთა ოკუპაციის დღედ არის გამოცხადებული.