ფოთის მერი გაეროს განვითარების პროგრამის (UNDP) პროექტი „ადგილობრივი და რეგიონული განვითარების ხელშეწყობა საქართველოში“ სამუშაო შეხვედრას დაესწრო

გაეროს განვითარების პროგრამის (UNDP) პროექტი „ადგილობრივი და რეგიონული განვითარების ხელშეწყობა საქართველოში“, საქართველოს რეგიონული განვითარებისა და ინფრასტრუქტურის სამინისტროსთან ერთად, 27 აპრილს სამუშაო შეხვედრა გაიმართა. ბათუმში გამართულ სამუშაო შეხვედრაზე, რომელსაც ქალაქ ფოთის მერი გოჩა კურდღელია და მერიის ინფრასტრუქტურული პროექტების მართვისა და ტრანსპორტის სამსახურის უფროსის მოვალეობის შემსრულებელი იაგორ რომანაშვილი დაესწრნენ, ადგილობრივი ეკონომიკური განვითარების ხელშემწყობი ღონისძიებები იქნა დაგეგმილი.
მუნიციპალიტეტების წარმომადგენლებთან ერთად იმსჯელეს ადგილობრივი ეკონომიკური განვითარების გამოწვევებზე, მათი გადაჭრის გზებზე, ასევე მოისმინეს შეთავაზებები. გამოკვეთა მომავალი თანამშრომლობის შესაძლებლობები. გაეროს განვითარების პროგრამის (UNDP) პროექტი – ადგილობრივი და რეგიონული განვითარების ხელშეწყობა საქართველოში, ფაზა 2 (FRLD 2) – მიზანია მხარი დაუჭიროს მუნიციპალიტეტების აქტიურ ჩართვას ადგილობრივი ეკონომიკური განვითარების პროცესში. მუნიციპალიტეტების დონეზე საინვესტიციო პროფილების შექმნა, საშუალოვადიანი სტრატეგიული დოკუმენტების შემუშავება, ბიზნეს გარემოს ხელშეწყობისთვის სერვისების მიწოდების ხარისხის გაუმჯობესება, მუნიციპალიტეტების წარმომადგენლების პროფესიული განვითარების ხელშეწყობა, შესაბამისი ექსპერტული დახმარების გაწევა და ინვესტორებთან ეფექტურ კომუნიკაციაში ჩართვის ფასილიტირება – ამ მიზნის მიღწევის მექანიზმებია. აღნიშნული მექანიზმების საჭიროება უფრო მნიშვნელოვანი ხდება COVID-19 პანდემიით გამოწვეული ეკონომიკური კრიზისის დაძლევის პროცესში.
ადგილობრივი ხელისუფლების მიერ საჯარო სერვისების მიწოდების გაუმჯობესება და კერძო სექტორთან გააქტიურებული თანამშრომლობა ზრდის პოტენციური ინვესტორების დაინტერესების შესაძლებლობებს. უმნიშვნელოვანესია ინვესტორებთან კომუნიკაციის ეფექტური სტრატეგიის შერჩევა, რათა მოხდეს ადგილზე არსებული რესურსების და პოტენციალის, ასევე კონკურენტული უპირატესობების სწორად და მაქსიმალურად წარმოჩენა.